Mega: Megaupload-en oinordekoa

Mega deituriko zerbitzua izango da Megaupload famatuaren oinordekoa. Bere aurrekariarekin izandako arazo legalak saihesteko, Kim Dotcom jabeak bi neurri jakinarazi ditu: alde batetik, biltegiratze gehiena hodei edo “cloud” en gordeko du, eta pasahitz sistema berri batek deskargen erantzule izatea galaraziko dio. 

Mega urte amaieran jarriko da funtzionamenduan, eta Megaupload ohiak eskaintzen zuenaren antzekoa eskainiko du: artxiboen deskarga zuzena, eta erabiltzaileentzako errazak diren tresnekin. Hala ere, desberdintasun handi bat izango du, datu guztiak zifratuak egongo baitira.

Horrela, artxiboa igotzen duenak baino ez du kontrola izango artxiboarengan, horrela, norbaitek jabetza intelektuala bortxatzen duen artxiboren bat elkarbanatzen badu, plataformak ez du horren gaineko erantzukizunik izango. Artxibo oro pasahitz batekin joango da, igotzaileak baino ez duena jakingo, eta honek nahi duenarekin elkarbanatuko du pasahitza eta, horrela, artxiboa. Ez Megak ez biltegiratzearen jabeak ez dute pasahitza momentu batean ere ez jakingo.

Biltegiratzea ere, esan bezala, aldatu egiten da, eta hein handi batean, autoritateen lana zaildu egiten du. Orain oso zaila da artxiboak kentzea, ez baitaude zentral batean gordeta, mundu osotik zabaldurik baizik. Maniobra berdina erabili du the pirate bay torrent bilatzaileak, pirateriaren aurkako autoritateak saihestu nahian. 

Dotcom-ek laguntza legal handia izan du hau martxan jartzeko, eta ziur dago ez duela legerik hausten zerbitzu berri honekin. Bere hitzetan, plataforma berri hau ixteko modu bakarra datuen zifratzea ilegala bihurtzea izango liteke, baina hau ezin izango liteke egin pertsonen pribatasun eskubidearen aurka baitago.