Mendizaleentzako aplikazioa garatu du EHUko ikasle batek

Android sistemadun sakelekoentzako aplikazio bat garatu du Maria Teresa Ruiz Monzón EHUko ikasleak. Aplikazio hau mendizaleentzat bereziki pentsatuta dago, “Google Earth-en antzekoa da, baina asmo zehatzagoa dauka”, egilearen esanetan. Izan ere, mendian lainoa sartuz gero ere bidea aurkitzeko aukera eskaintzen du informatika ikaslearen proiektu honek.

Mendizaleek haien mugikorretako 3D geolokalizazioa erabili ahal izango dute EAEko gailurretan ez galtzeko. Askotan, zaila izaten da bi dimentsiotako mapen bitartez mendian kokatzea, eta istripuak saihesteko funtzioa bete nahi du gasteizko gazte honen ikasketa amaierako proiektuak. Bideojokoetan oinarritutako teknikak erabili ditu Ruizek errealismo handiz irudikatzeko malda, koska eta amildegiak. Datu geografikoak eta erliebe mapak Eusko Jaurlaritzako www.geoeuskadi.net webgunetik lortu ditu. Gainera, hainbat programa gehitu behar izan dizkio Android sistemari, besteak beste OpenGL ES (programazio grafikorako interfaza), LaTeX (testu konposiziorako sistema) eta Sapefile (geodatuen fitxategietarako formatua).

Mapez gain, erabiltzailea non dagoen jakin behar du mugikorreko aplikazioak. Horretarako, smartphoneek izaten duten iparrorratz elektronikoa baliatu du, kamara moduan erabiliz. Telefonoa nora begira dagoen detektatzen du, eta beraz, zein den erakutsi behar duen irudia. Herraminta honek interneta behar du unean uneko geolokalizazio kontsultak eta fitxategien deskarga aldi berean egiteko. Hala ere, honek denbora har lezake mugikorren memoria mugatua dela medio. Hau saihesteko, deskarga bigarren plano batean burutzen da, aplikazioak funtzionatzen jarraitu bitartean.

Mendian internet estaldurarik gabe geratzea ere izan daiteke aplikazio honen bestelako arazo bat. Baina Ruizek horretan ere pentsatu du, eta fitxategiak aldez aurretik deskargatzeko aukera ematen du, gero konexio gabe erabili ahal izateko. Aplikazioa garatzen jarraitzeko asmoa du, eta gutxieneko hobekuntza batzuk egin eta gero, merkaturatzeko asmoa erakutsi du informatikari euskaldunak.

Amaiur Pagola Artze